ווי מיר פירן דעם טיש

• סיי וואס וואס איז נישט אין איינקלאנג מיט דעת תורה — און אודאי קיין שמץ פון כפירה, ניבול פה, אדער בזיון תלמידי חכמים.
• עפעס וואס גרעניצט זיך מיט א פגיעה בין אדם לחבירו — לשון הרע, רכילות, אדער מבייש זיין עמיצן ברבים.
• אנצינדן מחלוקת אדער פירוד לבבות, אדער דעבאטירן פאליטיק אויף א וועג וואס ברענגט צו קריגעריי.
• ארומרעדן לעבעדיגע פריוואטע מענטשן — אפילו לשבח — סיידן עס האנדלט זיך פון ברייט־באקאנטע עפנטליכע פערזענליכקייטן.
• מעלדן דעטאלן פון באטראפענע אין א טראגעדיע ה״י איידער עס איז דא אן אפיציעלע מודעה און די משפחה איז אינפארמירט.
• ברענגען לינקס צו אומאויסגעהאלטענע וועבזייטלעך אדער צו בלעטער מיט אומאיידעלע בילדער.
• אריבערברענגען ארטיקלען פון דרויסנדע מקורות אן זיי איבערצוקוקן און זיכער מאכן אז זיי פאסן פארן היימישן עולם.
• א לינק צו א שעירד פאלדער וואו דער אינהאלט קען זיך טוישן — סיידן מיט אן ערלויבעניש פון די הנהלה.

דער טיש איז פאר ערוואקסענע, און דער ציל איז אז יעדער זאל זיך פילן באקוועם. עטליכע פשוט'ע כללים — דער פינפטער שולחן ערוך פונעם טיש:

• איידער'ן שרייבן — טראכט אריין: וועט דאס צוגעבן פאר די ליינער, אדער פארקערט?
• האלט דעם טאן איידל און די באציאונג רעספעקטפול — אויך ווען איר זענט נישט מסכים.
• קומט איר אריין אין אן אשכול, כאפט קודם דעם גאנג פון שמועס, און בלייבט ביים נושא. נישט אוועקפירן א שמועס אויף זייטיגע וועגן.
• געפעלט אייך א תגובה? גיט א „דאנק" — דערפאר איז דא דער קנעפל. מען דארף נישט אנפילן אשכולות מיט ליידיגע קאמענטארן.
• ברענגט איר א לינק צו אן אלטן אשכול — שרייבט צו א קורצן תמצית וואס דארט שטייט, נישט סתם אריינווארפן א לינק.
• ביים ציטירן — נעמט נאר דעם חלק אויף וואס איר ענטפערט; לאנגע פולע ציטאטן מאכן שווער צו ליינען.
• יעדע אפטיילונג האט איר טעם: ערנסטע אפטיילונגען בלייבן ערנסט, אין די הילף אפטיילונגען ענטפערט מען מיט הילף (נישט מיט ווערטלעך), און אין נייעס איז נישט דער פלאץ פאר ביליגע צווישנרופן.
• דאס איז נישט קיין פלאץ פאר מחאות אדער קאמפיינען; ערנסטע קריטיק דארף געשריבן ווערן בהשכל ובדעת.

דאס איז איינער פון די וויכטיגסטע יסודות פונעם טיש, און מיר נעמען עס זייער ערנסט:

• עס איז שטרענג פארבאטן אויפצודעקן — אדער פרובירן צו דערגיין — ווער עס שטייט הינטער א ניק, אויף סיי וועלכן אופן: דא, אין פריוואטע מעסעדזשעס, אויף אימעיל, אדער אינדרויסן.
• דאס נעמט אריין פארשפרייטן אפילו א חשד אדער א קלאנג איבער עמיצנס אידענטיטעט, און אויך אויפדעקן א באנוצער'ס צווייטן ניק.
• האט איר א חשש אז עמיצער גריבלט אונטער אייער אנאנימיטעט — באריכט עס גלייך צו די הנהלה.

• קלויבט א פאסיגן ניק־נאמען וואס איז מקובל על הבריות. ניקס פון בלויז נומערן, נעמען פון באקאנטע מענטשן, אדער שפאט־נעמען — ווערן נישט אנגענומען.
• מאכט זיכער אז אייער ניק ענדלט נישט צו אן עקזיסטירנדן ניק — דאס פארמיידט צעמישענישן.
• נוצט אן אמת'ן אימעיל אדרעס — איר וועט דארפן באשטעטיגן אייער רעגיסטראציע, און וויכטיגע מעלדונגען קומען אויף אימעיל.
• אן אוואטאר זאל זיין עפעס איידל און אידישליך; אן אונטערשריפט נישט צו גרויס, נישט שרייעדיג, און אן אומאויסגעהאלטענע לינקס.

• זעט איר עפעס וואס איז נישט אויסגעהאלטן — דרוקט דעם באריכט קנעפל ביי דער תגובה, מיט עטליכע קורצע ווערטער פארוואס. עס וועט באהאנדלט ווערן שנעל.
• האט אייך עמיצער אנגעגריפן — ענטפערט נישט צוריק; באריכט עס, און די הנהלה וועט זיך אפגעבן דערמיט.
• באקומט איר אומפאסיגע פריוואטע מעסעדזשעס — באריכט זיי אויך.
• ווילט איר אראפנעמען עפעס וואס איר האט אליין געשריבן — נוצט די „פארריכט" פונקציע, אדער בעט די הנהלה.
• האט איר אן אידעע אדער א פראבלעם מיטן סייט אליין? עס וועט זיין א ספעציעלע „טיקעטס" סיסטעם וואו איר קענט אריינשיקן פארשלאגן און מיטהאלטן וואס עס טוט זיך דערמיט.

א ווארט וועגן פארלעצונגען: ביים ערשטן מאל באקומט מען פשוט א פריינטליכע ווארענונג. ווערט עס איגנארירט, קען דער באנוצער צייטווייליג אדער פערמאנענט פארשפארט ווערן, לויט די שאצונג פון די הנהלה. די זעלבע כללים גייען אן אין אלע אפטיילונגען און אויך אין פריוואטע מעסעדזשעס; ווער עס ציטירט אדער פירט ווייטער עפעס וואס איז נישט ערלויבט, ווערט גערעכנט ווי ער וואלט עס אליין געשריבן.